జీవిస్తున్నవాడు మనిషి
గతంలోనో
భవిష్యత్తులోనో కాదు
వర్తమానం లోనే
జీవించాలి
ఎవర్ని పలకరించినా
ఒకప్పుడు నేనూ.......
నెమరువేస్తాడు
వైభవాల్ని తలచుకొంటూ
వెలిగిపోతాడు
అప్రస్తుతం కాని
ప్రస్తుతాన్నే
ప్రస్తుతించాలిప్పుడు
గతాన్ని తవ్వి తలకెత్తుకొంటేనే
మాసిన తలల మురికి వదిలేది
అయినా
బ్రతుకును వెదుక్కోవాల్సింది
వర్తమానం లోనే కదా
కొన్ని సమష్టి నిన్నల పునాదులమీదే
నేను ఈ రోజు నిలబడ్డాను
అనుభవం కానిదేదీ నేటికి నిలవదు
నిలిచిన దానిలోని
పొల్లును తూర్పార బట్టి
మార్గాల్ని నిర్మించాలి
నిర్మాణాలకు ఎత్తిన రాళ్ల కింద
శిధిలమైన జీవితాల్ని వెదకాలి
వర్తమానపు చేదు
పులిసే కొద్దీ తీపెక్కుతుంది
ఇప్పుడు ఇక్కడ ఇలా బతకడం
అన్ని కాలాలకు విస్తరించడమే
మొదలైతేనే కదా విస్తరించేది
ప్రారంభాన్ని గురించే నా తపనంతా
మొదలుపెట్టు
జీవించడాన్ని
విస్తరించడాన్ని
ఇప్పుడే
ఇక్కడే
మొదలుపెట్టు
Saturday, November 14, 2009
Subscribe to:
Post Comments (Atom)
No comments:
Post a Comment