కొత్తగా మొలుస్తున్న నగరం లోంచి
హఠాత్తుగా అంతెత్తున లేచిన
ఆకాశ హర్మ్యాల లోంచి
జన సంచారం లేని
ఇళ్ళ గుట్టల మధ్య
నేనోక్కడ్ని నిలిచి
విచ్చు కుంటున్న చేతుల కోసం
అన్వేషిస్తున్నాను
ఈ ఖాళీ గూళ్ళల్లో
ఎ వలస పక్షు లొచ్చి చేరతాయో తెలియదు కాని
గూడు కట్టుకొన్న పిట్టలు
పొట్ట చేత పట్టుకొని ఎటో ఎగిరెళ్లి పోయాయి
మా వూరి దాకా నడిచొచ్చిన
నగరం మధ్యలో
మాయిల్లోక దిష్టి బొమ్మ
ఉదయపు నడక నుండి
సాయంత్రపు ఈత వరకు
సకల సౌకర్యాలతో కొలువైన లోగిళ్ళ లో
మాటల సమూహాలే కరువయ్యాయి
అక్కడక్కడా సగం అల్లి వదిలేసిన
గిజిగాడి గూళ్ల లో
పాదముద్రల కోసం వెతుకులాట
ఎ అపరాహ్న వేళో
ఎవరైనా వచ్చి తలుపు తట్టి
దాహం తీర్చ మంటారేమోనని
చెంబేడు నీళ్ళతో నిలబడున్నాను
నా వైపుగా ఏ అడుగు కదలి రాదు
శబ్ద ప్రవాహాలలో ఈదులాడిన నాకు
ఇక్కడి మౌనాలు
నన్ను నాలోకి ఈడ్చు కెళుతున్నాయి
బహిర్గతం కాని సంభాషణల్లో
అందరి తోనో కొందరి తోనో
మాటల గలగలలు ముంచేత్తెదాకా
నిరంతరం మాట్లాడు తూనే ఉంటాను
--- --- ౦౦౦ --- ----
Saturday, November 14, 2009
Subscribe to:
Post Comments (Atom)
No comments:
Post a Comment