వెంటాడని వాక్యం

లక్షల అక్షరాల్ని ముందుపోసుకు కూర్చున్నా
తొలకరికి ముందు
విత్తనాల కోసం
వేరుశనగ కాయల్ని ఒలిచినట్లు
ఒక్కో అక్షరాన్ని ఒలుచుకుంటూ
విత్తనాల్ని ఏరుకుందామని
పొట్టు పొల్లు తప్ప తాలు - తప్ప
గట్టి విత్తనం ఒక్కటి కనబడదేం
మనసు పొలంలో నాటుకుందామంటే
గుట్టలు గుట్టలుగా అక్షరాలు
దుర్భిణి వేసి వెతికినా కానరాని కవిత్వం
రైళ్లనిండా బస్సులనిండా రహదార్ల నిండా
క్రిక్కిరిసిన వాక్యాలు
ఒక్క వాక్యమూ వెంటరాదేం
సాగిలాపడి నమస్కరిద్దామంటే
అనంతాక్షర సముద్రాల్ని ఈదుతున్న నాకు
మార్గాల్ని సూచించే దీపస్థంభాలు కావాలి
దీపం కాంతిని పంచుతూ మరో దీపాన్ని వెలిగించాలి
పుస్తకమంతా విస్తరించిన అక్షరాల్లోంచి
రాలి పడుతున్న అనుభవాలు
ఏ అనుభవమూ మార్గదర్శి కాదు
***
పిట్టల రెక్కల కింద నుంచో
చెట్ల చిగురుల్లోంచో
సముద్రపు అలల నురగల్లోంచో
ఏవో కొన్ని అక్షరాలు
మనసు పొరల్లోకి జారిపడతాయి
గుండెల్లో భధ్రంగా పదిలపడతాయి
ఆ అక్షరాల కువకువల్లోంచే
నన్ను నేను శుభ్రపరుచుకొని
అడుగులు వేస్తుంటాను.
***