మాంసాహారం అలవాటున్నా
మా యింట్లో నిత్యం పప్పు ఉడకాల్సిందే
అదీ ముద్ద పప్పు
జాది లోని ఆవకాయ తోనో
గోంగూర తోనో
నాలుగు చుక్కలు నెయ్యి తగిలించి
చెయ్యార కలిపి
ఒక్క ముద్ద నోట్లో పెట్టుకుంటే
బిర్యానీలు పిజ్జాలూ బర్గర్లు ఎందుకు పనికొస్తాయి
అమ్మమ్మ కంది పప్పు తయారు చెయ్యడం కుడా ఒక కళే అంటుంది
వగరోగరుగా చేలో కంది కాయల్ని తెంపుకొని
యింత ఉప్పేసి వుడకబెట్టి తినడటం దగ్గరనుంచి
యింట్లో మెట్టు మీద
కందుల మూటలు పెర్చేదాకా
ప్రతీది ఓ విన్యాసమే
ఆనోపంగా పెరిగిన కంది చేలో
రెండు పనల జ్ఞాపకాల్ని కోసుకొని
మంచు తెరలతో మెత్తబడ్డ
మనసు పొరల్లో ఊరేసుకొంటున్నాను
శీతాకాలపు సూర్యోదయ వేళల్లో
వెచ్చ వెచ్చగా చలి కాగుతూ
కంది పుల్లను నములుతున్నాను
నిన్నటి దాకా
కంది చేను
నా రహస్య జ్ఞాపకాల పేటిక
ఇవాళ చారెడు కందిపప్పు కోసం
రేషన్ షాపు క్యూ లో నిలబడ్డాను
ఒకప్పుడు డబ్బాల నిండా నిలవున్న పప్పులు
ఇవాళ నా చేతి సంచి లో
ఒక మూలకు ఒదిగి పోయాయి
ఎంత ఉడకబెట్టినా ఉడకక
పంటి కింద రాళ్ళయ్యాయి
నా చేలో కాసిన కంది చెట్టు కాయలు
నగరం నడిబొడ్డున
ఎవరికీ కనబడకుండా దాంకున్నాయి
నక్షత్రాలలో నక్షత్రాలై పోయిన
నాలుగు కంది బేడల్ని
గాలించి గాలించి
నా యింటి దాకా లాక్కెళ్లాలి
గాదె లోని కందిపప్పు ను
గాదె కింద పంది కొక్కులు బొక్క కుండా చూడాలి
--- ౦౦౦ --- ౦౦౦ --- ౦౦౦ ---
Friday, November 13, 2009
Subscribe to:
Post Comments (Atom)
No comments:
Post a Comment